人間限定的拉麵

星期日周圍都落住毛毛雨，我同男朋友一早去中央圖書館睇完書後，就喺附近的大坑搵嘢食
大坑唔知由幾時開始，變得越來越多嘢食, 拉麵、甜品店、西餐廳等等，都非常之有特色

冒住微微嘅細雨，係浣沙街較尾既位置就見到呢間“拉麵來”

點解唔係好多位置，好彩我哋到嘅時候仲有位
呢度嘅裝飾很懷舊，有好多日本的玩具、海報，有鐵甲萬能俠、超人等等，有復古風的味道

拉麵嘅款式都幾多元化，除咗傳統嘅豚骨湯底，仲有雞湯、魚介豚骨、黑蒜油等口味，實在好難揀得落手
本來打算叫小林師傅於日本得奬的作品魂之一杯，可惜呢碗麵每日只係限量供應（大坑店先有），我哋黎到時已經賣晒。。。
食唔到得奬作品，鍾意食辣嘅我就揀了火激辛豚骨湯面，男朋友就叫左人間限定的北海道花咲蟹蟹味噌雞白湯拉麵

火 - 激辛豚骨湯面 + 糖心蛋 ($96+$17)

一開始望落都唔覺得好火，但望真啲原來有一個辣醬整成的“波波“，將佢攪勻之後，整碗拉麵就變成鮮紅色，火味十足！立美十足，越食越辣，啱晒我呢啲鍾意食辣嘅人！日本叉燒肉質嫩滑，麵質岩岩好，爽口彈牙；而糖心蛋是流心的，又唔會太生。

人間限定 - 北海道花咲蟹蟹味噌雞白湯拉麵 ($168)

呢款拉麵可能係全店最貴既款拉麵。就試吓佢有幾正先，一上菜就被佢既蟹棒嚇親，仲粗過隻手指，食落裡面又啖啖肉，可能係因為蟹腳的關係，個湯濃郁清甜，小妹都忍唔住係咁飲；除咗蟹腳，仲有好多配料：日本叉燒、香醇、糖心玉子、肉蔥絲等，仲有好多配料：日本叉燒、香荀、糖心玉子、玉蔥絲等等。係咁偷男友的配料食:P

總體來說，食物嘅質素唔錯，加上餐廳嘅氣氛配合得宜，值得再嚟一試！

大大份的Goobne Chicken

自從上次男友帶我喺中環食左一次Goobne Chicken後，就一路都想搵機會再食

今次係尖沙咀經過見到，即刻捉男友同我入去食！

韓國組合既紙板廣告，連店員都是韓國人（要用英文溝通），依然有來到了韓國的感覺

環境舒適，和餐牌上食物的精美照片，唔錯唔錯，今次推出左幾款新嘅菜式，唔執輸嘅我哋梗係要試一試啦！

（新菜式）鐵板軟芝士甜辣脆雞 $168

賣相非常吸引！用鐵板承載住除左令賣相更好外，仲可以保持熱辣辣；雞肉的肉質幼嫩，而且好體貼咁去咗骨，可以好放心咁去食，佢嘅韓式甜辣醬調校得啱啱好，甜甜地辣辣地好開胃，加埋呢款拉絲芝士，真係唔錯！

招牌凱撒沙律 $108

呢碟沙律嘅份量真係唔講得少，個盤有我塊面咁大，內容都好豐富，清新嘅蔬菜配上經典的凱撒沙律醬，味道非常清新，有助中和其他菜式的濃味。

韓式炒粉絲雞蛋卷 $148

呢份韓式雞蛋捲配料非常豐富，有韓式炒粉絲、黃瓜、紅蘿蔔、餐肉等等，配上芥末醬及茄汁，放落口有唔同嘅口感，不同的層次令人一試難忘！

每款菜式都各有特色，只不過這裏每一碟餸的份量都好大，我們兩個都差啲食唔晒……

如果你諗住試多幾樣的話，記得一定要叫埋一班知己好友！

咁好嘅食物如果食唔晒就太浪費啦！